زجل مغربي /هنا جيت / بقلم : عادل الغيوان
هنا جيت. ........
أنا جيت عندكم يا الحباب
يا اهل الحكمة وصواب
ياك المرسول عندوا جواب
زاوية معروفة بالحكمة والآداب
حتى أنا مجذوب لابس دربالة وجلاب
حامل مقراج ومحرف بقراب
حامل سنتير كناوي بعقيق وهذاب
بغيت حلمي مع المجاذيب يتحقق
الحرف والكلمة ترمم وتلصق
بخيط المحبة تحزم وتشنق
ما نخلو الحرف يهرب ويزهق
ناشدوا العالم يطلق حمام السلام يرفرف ويحلق
وبيبان المحبة تفتح بلا ما تحتاج دق
رآه نار فقلبي تحرق
أنا جاي فرادي
قصد الزاوية وفيها مورادي
فيها نتكلم ونغوت ونادي
فزاوية بغيت ندق اوتادي
بنغمة سنتير يحلى نشادي
كلام واتاي بلادي
راني جاي مسلام. ...
انا محضري مزال باغي نتعلم
مزال الكلام فلساني يلعتم
مزال كنخطط ونظم
اسيادي هل الزاوية بغيت البخور ورسم
بغيت نعرف كيف المجدوب يتحزم
وكيف يشدوا الحال وبالبوح يتكلم
بغيت نشد طريق ونزعم
طالب ربي فامري يحسم
انا مجدوب بجوي والبخور ننغم
ربي عالى وعالم
****بقلم عادل الغيوان ****
تعليقات
إرسال تعليق