بمناسبة عيد العمال وعيد الشهداء، وعيد التحرير المصادف في ٢٥ أيار.بقلم. كلمات : الحاج خليل محمد غريب.
صباح الخيرات والبركات.بمناسبة عيد العمال وعيد الشهداء، وعيد التحرير المصادف في ٢٥ أيار ،أتقدم من جميع الأصدقاء والمتابعين والعمال وأرواح الشهداء وعوائلهم بأحر التهاني والتبريكات راجيا من المولى القدير التوفيق للجميع والرحمة للشهداء والسلام والبحبوحة لكل الحبايب .
طل الربيع ، وطل بقدومو الأمل
وجرح الشتي الغدَّار فرفح واندمل
ونيسان جاي مبشنق بتوب الزهور
حامل ل قانا شال بعدو ما اكتمل
ونوَّار عنا متل بوابة عبور
بتصريح رسمي أوَّلو ما بينهمل
وسادس يوم بيضل عنوان السرور
رمز الشهادة مسطر بأروع جُمَل
وخمسة وعشرين بالنصر ممهور
تحرير كامل شعب مع ارضو شمل
يا شمس نوار طلي عالحضور
وجيبي من الفردوس نسمة طيبة
بعيد النصر والشهادة وعيد العمل
جيبي من الفردوس للشاعر عَبَا
عليها انسجي آيات تمجيد وإبَا
ومن حول منو تمايلي بغنج ودلال
حتى يحن لعهد أيام الصبا
يا شمس ضلي تذكري قبالك هلال
ممنوع يظهر جهر لو مهما حَبَا
الا بنص الشهر رَخيِّلو المجال
ت يضل فارس ، بدر عمرو ما كَبَا
وعودي ب رقة وذوق يا بنت الحلال
منو اسرقي أبراج ت ينوس برواق
أحسن ما يبقى الأرض كُلا مسرسبا
الشاعر رصيدو الحب بعد الموهبي
من هيك بتشوفو على الفطرة رِبِي
بيضل عاشق دوم عاطول الدني
ولولا كِره بالحب وحدو بيختبي
مهما الليالي تعاركوا ما بينحني
بيضل صابر متل أيوب النبي
والفرح عندو متل زهر السوسني
ما بيعترف بالحاقد بشرعو غبي
بالحب ، وحدو بينتعش وبيغتني
وبالعاطفة بيحس شو معنى العطاء
وقديش طُهر الحب مفهومو أَبِي.
******************كلمات : الحاج خليل محمد غريب.
تعليقات
إرسال تعليق